Archive for Abril 2008

Novidades para o público pequeno

Abril 30, 2008

A Nosa Terra destaca nunha información ás máis recentes novidades infantís da editorial. A eses títulos hai que engadir dous novos merliños, álbums en rústica para os primeiros lectores: Bea de Iván Sende e Bertiño Rompetodo de Ramón Caride e Chus Ferrín.

Bea, aínda que hoxe xa é maior, hai trinta anos tamén era unha nena. E igual que as nenas de hoxe en día sempre quere quedar cinco minutiños máis na cama antes de se erguer para ir á escola. Bea vive cos seus pais e mentres coida das súas irmás, estuda e fai os deberes, rega as plantas… pensa que vai ser de maior: ¿será deportista, bandoleira, astronauta?, pero ten un segredo, hai algo que lle gusta moito facer e co que goza sempre que pode. Ás veces non é doado ser a irmá maior.

Bertiño é un neno trasto, sempre que quere facer algo remata rompendo todo. Fai a merenda e a cociña remata desfeita, colle un conto na librería e alá van os andeis e os libros, ata na gardería respiran se Bertiño cae con febre. Bertiño pon patas arriba a consulta do pediatra…

Advertisements

Presentación de “Alimentación saudable”

Abril 29, 2008

O venres, 9 de maio, ás 20,00 horas, na Casa do Libro de Vigo presentarase Alimentación saudable de Xulio Astor e Montserrat Astor. No acto participarán Mª José Pérez Mariño (Directora Xeral de Ordenación e Innovación Educativa, Manuel Bragado e os autores.

Que son as calorías baleiras? Por que é necesaria a fibra dietética? Que teñen de especial os ácidos graxos omega-3? Como é un menú axeitado para persoas con problemas de colesterol? Existe relación entre saúde e distribución de graxa corporal? Por que a obesidade é unha enfermidade? Que é iso dos prebióticos e probióticos? Este libro pretende, cunha linguaxe sinxela e amena pero con toda a rigorosidade científica, contestar a estas preguntas e moitas máis que interesan ao gran público. Nos últimos anos os coñecementos sobre nutrición avanzaron a unha enorme velocidade, e as pautas, que ata hai ben pouco a ninguén se lle ocorrería pór en discusión, considéranse agora totalmente obsoletas. Unha dieta equilibrada e variada é fundamental para a saúde e benestar de cada un de nós, e un consumidor ben informado terá os coñecementos necesarios para poder tomar as decisións correctas sobre a súa alimentación.

Presentación de “Limpeza de sangue”

Abril 28, 2008

O día 8 de maio, xoves, ás 20:00 horas, na Galería Sargadelos de Lugo presentarase Limpeza de sangue, a obra pola que Rubén Ruibal mereceu o Premio Nacional de Literatura Dramática. No acto participarán o autor, acompañado por Xaime Pena e Manuel Bragado.

Limpeza de sangue (o sangue fai ruído) de Rubén Ruibal foi a obra gañadora do XIV Premio Álvaro Cunqueiro para Textos Teatrais do ano 2005. Os seus protagonistas, Fernando e Pantaleón, procedentes de mundos aparentemente opostos coinciden, á espera do seu transplante ou do inevitable pasamento, na sala de diálise dun hospital. Igualados pola situación e obrigados a facerse mutua compañía, coñecen outros aspectos da vida aos que a rutina diaria non lles permitiu que lles prestasen atención. Ven nacer así unha amizade inimaxinable, mentres todo ao seu redor continúa o seu obsesivo, prexuízoso e sistemático funcionamento, no que nin sequera unha inocente proposta roubada de Príncipe e mendigo de Mark Twain abrirá unha nova porta.

Fernández Paz e Justo Beramendi, Premios AELG 2007

Abril 27, 2008

No seo da Cea das Letras, celebrada onte en Santiago, Agustín Fernández Paz e Justo Beramendi recibiron os Premios AELG 2007 correspondentes ás categorías de Libro infanto-xuvenil e Ensaio, respectivamente. Os premios foron concedidos tras as votacións realizadas por 367 membros da AELG e, no caso do premio infanto-xuvenil, tamén polos de GALIX.

A obra premiada de Fernández Paz foi O único que queda é o amor, que no mes de decembro pasado xa recibira o premio Xosé Neira Vilas ao Libro Infantil e Xuvenil do ano 2007, concedido pola Asociación Galega de Editores.

Hai unha trama de fíos invisibles que une as vidas dos personaxes deste novo libro de relatos de Agustín Fernández Paz, ilustrado por Pablo Auladell: Diana, Sara, Pablo, Laura, Adrián… todos se namoran e descobren que o amor é un sentimento poderosísimo, capaz de transformalos por enteiro e facerlles a vida doutro xeito. Mais tamén experimentan a amargura do desamor, ou da ausencia, ou dos amores rotos. O amor en todas as súas variantes: desde o primeiro amor adolescente ata que se mantén máis alá da morte. Aínda sabendo isto, as persoas sempre buscamos na nosa vida ese sentimento tan necesario como o aire que respiramos, quizais porque intuímos que, como escribe Orhan Pamuk en Neve, “na vida o único que queda é o amor”. E sempre, os libros como compañeiros da aventura do amar. Un libro memorable.

Pola súa banda, o premio recibido por Beramendi, na categoría de Ensaio, correspondeu a De provincia a nación. Historia do galeguismo político, obra que hai dúas semanas recibira o Premio á Obra Editorial do ano 2007, concedida pola Federación de Libreiros de Galicia.

Tamén foron premiados polos asociados da AELG Xosé Luís Méndez Ferrín (Mellor traxectoria xornalística), Iolanda Vilarchao (Tradución), Miguel Anxo Murado (Narrativa), Marica Campo (Poesía) e Millán Picouto (Teatro).

“As mellores intencións”

Abril 26, 2008

Outro libro que acaba de chegar ao almacén é As mellores intencións, a primeira novela de Begoña Paz, gañadora do Premio de Narrativa breve centenario do Concello de Riveira. Nas librarías na primeira semana de maio.

As vidas de Gabriel e Lis encóntranse en Aldara, a cativa a quen el quere salvar, a quen ela só sabe odiar. Amor e odio, verdade e mentira son os alicerces duns personaxes que se debaten entre a decepción pola vida que lles tocou en sorte e a esperanza de que, por unha vez, todo poida ira a mellor. As mellores intencións é unha historia de amores obsesivos, os que senten Gabriel por Aldara, a cativa pola súa nai, Lis polo “miñoca”. Un conto cruel cunha rapariga enfeitizada, unha cinsenta ferida e ferinte e un narrador que agocha, baixo a máscara da pasividade, unha cerna escura e implacable.

“A represión lingüística en Galicia”

Abril 25, 2008

Inmersos nun profundo debate sobre o futuro da lingua, acaba de chegarnos ao almacén A represión lingüística en Galiza no século XX (Aproximación cualitativa á situación sociolingüística de Galiza), o voluminoso libro (case 900 páxinas) profesora pontevedresa María Pilar Freitas Juvino. Cremos que estamos diante dunha contribución decisiva e moi clarificadora para abordar este debate fulcral para a sociedade galega. O libro da profesora Freitas estará nas librarías a comezos do mes de maio.

Nun momento en que desde algúns sectores minoritarios da sociedade se pide a derrogación da Lei de Normalización Lingüística, en en nome da liberdade, se pretende revogar o decreto polo que se regula o uso e promoción do galego no sistema educativo, ou mesmo se propón lexislar para protexer o castelán fronte á imposición das outras linguas españolas, este libro da profesora María Pilar Freitas Juvino, ven a demostrar que se houbo unha lingua reprimida e perseguida en Galicia esta foi o galego. A represión lingüística en Galiza no século XX sitúase no contexto do contacto, substitución e morte de linguas como resultado, na maioría dos casos, dun proceso de imperialismo lingüístico. Fronte a isto, deféndese o ecoloxismo das linguas como unha caracterización arrequecedora, inherente ao ser humano e necesaria para a súa supervivencia.

Neste libro realízase unha exhaustiva análise das innúmeras agresións sufridas pola lingua galega ao longo do século XX, desde a lexislación emanada polo poder para lograr a imposición do castelán en todo o territorio nacional, ata o desmantelamento de institucións culturais, a persecución dos galeguistas ou a desprezo e a burla sufrida polos galegofalantes. Ademais, analízase a actitude de institucións como a Real Acaemia Galega ou a Igrexa con respecto da lingua de Galicia. Finalmente, investígase acerca de como esta realidade sociolingüística se viu plasmada na literatura galega, pois a literatura funciona como un espello no que se reflicte, non só a persecución e o desprezo ao galego, senón o complexo de inferioridade que estas actitudes prexuizosas xeraron na sociedade.

Nova entrevista a Xosé Lois Ripalda

Abril 24, 2008

Xosé Lois Ripalda, autor d’ A cultura do pan, é entrevistado no Faro da Cultura.

“Incertos”, primeira crítica

Abril 24, 2008

Incertos, o primeiro libro de relatos de Antón Dobao, conta dende hoxe coa súa primeira crítica. Dolores Martínez Torres publica en Faro da Cultura un interesante traballo que debulla cada un destes contos sobre a identidade e a aparencia.

“A lúa dos Everglades”, crítica interesante

Abril 22, 2008

Xosé Manuel Eyré publica unha interesante crítica d’ A lúa dos Everglades a novela de Xesús Manuel Marcos, gañadora do premio de narrativa Terra de Melide 2007. Transcribimos un dos parágrafos do texto.

A lúa dos Everglades de Xesús Manuel Marcos obtivo o galardón do sétimo certame melidense. Trátase dunha boa novela, do melloriño que a narrativa galega do ano pasado nos deixou. Alá polo verán de 2005 xurdía a noticia de que Sofía Romo, irmá de Prudencio Romo, emigrada nos USA, logo dun atraco sufría amnesia, non era quen nin de lembrar o seu propio nome e cantaba acotío cancións de Os Tamara, preciamente por elas sería como, tras moitos meses de procura, a darían atopado nunha residencia estadounidense. Caso de violencia contra os emigrantes que, desafortunadamente, non é único. Esta é a orixe, o impacto que produciu no autor. Isto e mais a conciencia do desamparo que padece a vellez nos nosos días. E velaí, logo, que os versos de cancións de Os Tamara que salfiren o discurso non obedezan a un oportuno aceno de cara á galería. E velaí, logo, que sería ben que a homenaxe do autor se vise acompañada da do lector.”

Presentación de dúas obras de Varela Buxán

Abril 22, 2008

O vindeiro sábado, 26 de abril, ás 20:00 horas, presentaremos no Teatro Principal da Estrada Se o sei… non volvo á casa e Taberna sen dono, as dúas pezas de Manuel Varela Buxán, publicadas na colección Biblioteca das Letras Galegas en edición de Xosé Luna. O acto, que comezará coa intervención musical de Manoele de Felisa, contará coa participación de Xosé Luna, Carlos Loureiro, Ramón Nicolás, Manuel Méndez, Manuel Bragado e José Antonio Dono. Ao remate o Grupo de Teatro Coto Manguelo porá en escea a obra Pista ou Peste de Varela Buxán.

A figura de Manuel Daniel Varela Buxán (1909-1986) é a dun dramaturgo galego de obra prolífica que cumpría revisitar a través dunha edición coma a presente. Ofrécense así senllas pezas clave na súa bibliografía: Se o sei… non volvo á casa e mais Taberna sen dono, acompañadas dun estudo crítico e contextualizador, preparado por Xosé Luna Sanmartín, e enriquecidas coa inclusión de abondoso material fotográfico e documental. Co presente traballo preténdese facilitar a accesibilidade aos traballos teatrais de Varela Buxán ao tempo que se lle quere tributar un necesario recoñecemento a ese labor calado, intenso e fundamental que realizou polo noso teatro, tanto na emigración arxentina coma en Galicia.

Presentación “O segundo sexo” en Vigo

Abril 21, 2008

O vindeiro venres, 25 de abril, ás 20:00 horas, na Libraría Librouro de Vigo realizarase a presentación do primeiro tomo d’ O segundo sexo de Simone de Beauvoir en Vigo. No acto participarán María Xosé Queizán, Marga Rodríguez Marcuño (tradutora da obra), Manuel Bragado e Carme Adán. Aquí pode atoparse información sobre a primeira presentación da obra, coeditada por Xerais e a Secretaría Xeral de Igualdade.

Hai libros que nos acompañan moito tempo despois de telos lido. Que abren camiños para o pensamento permanecendo vivos anos despois da súa primeira publicación. Este é o caso d’ O segundo sexo de Simone de Beauvoir, un texto imprescindible para os movementos de mulleres e a primeira reflexión filosófica de calado sobre a construción da condición feminina. Unha obra, publicada en 1949, que abriu debates sobre temas claves para o avance das mulleres, nomeadamente, a importancia da súa independencia económica, a redefinición do seu papel nas familias e na sociedade, a deconstrución da mística da maternidade ou a capacidade de decisión das mulleres sobre o seu propio corpo e da súa vida. Deixou claro que a bioloxía non é o destino. E, polo tanto, deu azos a moitas xeracións de mulleres para buscar formas para participar e transformar a vida social e política. A obra Beauvoir ten a virtude de ser contemporánea moitos anos despois. E agora a súa edición en galego, traducida por Marga Rodríguez Marcuño e introducida por África López Souto, no ano do centenario do seu nacemento apunta nesta mesma liña. As nosas letras enriquécense cun texto fundamental para a humanidade que xerou unha rede de pensadoras e activistas que transcende xeracións, clases e países.

“A casa da luz” será levada ao cine

Abril 20, 2008

A casa da luz, a novela de Xabier P. Docampo, publicada na nosa colección Sopa de Libros, será levada ao cine este ano polo director Carlos Amil Serantes e producida por Vimbio Filmes. A película será “unha das primeiras longametraxes de imaxe real para nenos” que se realicen en Galicia e será rodada integramente en galego. A produtora iniciará a finais deste mes de abril por toda Galicia as probas de repartición para elixir os protagonistas, buscando “nenos de entre 8 e 13 anos de todas as nacionalidades e etnias”.

Alicia é unha rapaza trastísima e, ao parecer, todo lle vén do seu ingobernable desexo de saber, de coñecer e de experimentar. Cando Alicia e os seus amigos inseparables, Álvaro, Aida, Alba e Anxo se afanaban en construír unha cabana interminable onde planificar os seus xogos, apareceu Pumariño, un vello que andaba sempre a picar nas paredes da casa de Eiravella. Alicia e a súa panda descubrirán que trala mudez do reverencioso Pumariño, arrástrase unha tristísima ferida familiar que vén dos tempos da guerra. O desexo de coñecer que impulsa Alicia levará a panda a amigarse con aquel toliño que vivía nunha casoupa das aforas, onde gardaba tesouros extraordinarios: saquetiñas de tea que ocultaban xoais, aneis e brincos, moedas de ouro, reloxos de peto… Pero os maiores segredos que Pumariño desvelará a panda seran os seus debuxos, paisaxes marabillososas que ninguén en Eiravella sería quen de imitar e, sobre todo, a entrada á casa da luz, onde se aliñaban unha morea de cadros. Naquela casa da luz, Alicia e os seus amigos poderán entrar nos propios cadros e vivir as aventuras que algún día, Duarte o pintor que descoñecen, imaxinou e non foi quen sequera de pintar. Unha viaxe fantástica que permitirá aos rapaces percorrer o labirinto da torre e coñecer aos homes que perderon as ás. Viaxar dentro de cadros que falan do futuro que nos agarda, un futuro que só se pode albiscar do outro lado dos cadros.

A casa da luz, a última novela de Xabier. P. Docampo, recolle a aventura dunha panda de rapaces e rapazas que entran en contacto co mundo da arte e da memoria da guerra dun tempo pasado. Unha aventura que vai acabar por modificar a súa forma de estar no mundo e que constitúe unha reivindicación, tamén, da beleza e da arte. Os cadros que atravesán os protagonistas, obra de grandes pintores como Dalí, Escher ou Palo Ucello, son recreados no libro polo ilustrador Xosé Cobas, empurrando ao lector xove de forma irresistible cara ao mundo da arte.
Premio de Literatura Infantil e Xuvenil ”LECTURAS” (modalidade de 11 a 13 anos) GALIX 2004.

“A idade da auga”

Abril 20, 2008

Cesare publica no seu blog As túas balas unha anotación sobre a súa lectura d’ A idade da auga, o libro de James R. Salter que apareceu o pasado mes de xaneiro. Recollemos un anaco:

“Sempre crin que o que máis me gustaba da escrita de Uxía Casal era que non parecía galega, senón alieníxena. Algo do mesmo sinto cando leo fugazmente as páxinas d’ A idade da auga, de James Salter, a primeira novela deste escocés de glaspop, editada directamente en galego e centrada, en boa parte, na Cidade. Relatos fermosos, alieníxenas, escritos de xeito que esa paisaxe que recoñecemos como propia sexa ao mesmo tempo calquera paisaxe e todas as paisaxes: unha cidade de ciencia-ficción, de algoritmos e casualidades; unha presada de contos que se esfiañan, que nin empezan nin acaban, como snapshots dun edificio reflectido nunha pinga de auga. Non son historias extraordinarias: só a discreta e húmida ficción do común.”

Xurxo Souto e Fernández Paz en Literactúa

Abril 19, 2008

Xurxo Souto con Tres trebóns e Agustín Fernández Paz con O único que queda é o amor participaron nos vindeiros meses no programa Literactúa, organizado polo concello de Carballo.

“Herba moura” en italiano e holandés

Abril 18, 2008

Hoxe recibimos as edicións italiana e holandesa da novela Herba moura de Teresa Moure.

A edición italiana Le tre donne di Cartesio , cunha tirada de 14.000 exemplares e encadernación en tapa dura, foi preparada pola editorial Corbaccio do Gruppo Editoriale Mauri Spagnol.

A holandesa Nachtschade, cunha tirada de 3.000, tamén en tapa dura, apareceu na editorial Signatuur.

Estas edicións engádense ás xa publicadas en castelán, catalán e portugués da novela de Teresa Moure, que obtivera en 2005 o Premio Xerais de Novela.

Entrevista a Xesús R. Jares

Abril 18, 2008

A raíz da celebración hoxe do Serán pola paz, onde serán presentados os dous primeiros volumes de Educación e paz, La Voz de Galicia e Faro de Vigo entrevistan a Xesús R. Jares.

Presentación “Educación e paz”

Abril 17, 2008

O venres, 18 de abril, ás 20:00 horas, no seo da celebración do Serán pola paz no Teatro Caixanova de Vigo, serán presentados os dous primeiros volumes da triloxía Educación e paz, coordinada por Xesús R. Jares. No acto, no que intervirán os grupos Abe Rábade Trío e Berrogüetto, ademais de ensaístas e escritores participantes na triloxía, está previsto que asistan preto dun milleiro de persoas.

No primeiro volume, Educación e paz I. 25 anos de Educadores pola paz, da autoría de Xesús R. Jares, recóllese a historia dos 25 anos de funcionamento do grupo Educadores pola Paz de Nova Escola Galega, o primeiro grupo da historia de Galicia de Educación para a Paz e un dos pioneiros no resto de España. O libro recolle a orixe do grupo, os seus obxectivos, as actividades desenvolvidas, as publicacións realizadas, os programas deseñados, as propostas feitas, as ilusións presentes e as esperanzas de futuro. Nesta crónica dos 25 anos de Educadores pola Paz o autor está acompañado por catro colaboracións que falan de outras tantas experiencias de educación para a paz: Xosé Manuel Cid en Ourense, Xosé Manuel Rodríguez desde Santiago, Flora Fondevila das Escolas asociadas á UNESCO e Manuel Blanco do Programa “Vivir xuntos, convivir” de Lugo.

No segundo, Educación e paz II. Presente e futuro da construción da paz, volume coordinado por Xesús R. Jares, recóllense as colaboracións que fixeron uns 40 ensaístas (Gregorio Peces Barba, Carlos Taibo, Xulio Ríos, Vidal Beneyto, Xurxo Torres Santomé…, entre outros) de distintas disciplinas e países agrupadas en tres capítulos: “O mundo no que vivimos e propostas de futuro”; “Escenarios e presupostos de paz” e “O papel da educación para a paz e os dereitos humanos”.

“Hordas de escritura”, no “Faro da Cultura”

Abril 17, 2008

Crítica de Armando Requeixo en Faro da Cultura de Hordas de escritura, o poemario de Chus Pato.

Presentación “II premio Diario Cultural de Teatro Radiofónico”

Abril 16, 2008

O xoves, 17 de abril, ás 20:30 horas no Teatro Principal de Pontevedra realizarase a presentación do libro cede, editado por Xerais, que contén as catro obras finalistas do “II premio Diario Cultural de Teatro Radiofónico“, convocado pola Radio Galega. Baixo a dirección artística de Quico Cadaval, durante o acto realizarase a dramatización do premio do Xurado, O mal da vaca de Begoña García Ferreira e do premio da audiencia, Saltimbanqui de Lois Pérez Díaz. Presentado por Ana Romaní e Anxo Quintela, na velada actuarán, ademais, “Tres peixes voando” (Ugía Pedreira, Xabier Díaz e Guillermo Fernández).

O xurado deste II premio de Teatro radiofónico estivo composto por Cristina Domínguez, directora do Centro Dramático Galego; Ana Romaní, directora do Diario Cultural da RG; María Bouzas, actriz e presidenta da Academia Galega do Audiovisual; Quico Cadaval, actor e director e Camilo Franco, crítico teatral. O xurado destacou que a obra gañadora, O mal da vaca, é unha comedia fresca, ben estruturada, cuns diálogos coidados, mediante os que se constrúen uns personaxes matizados e complexos. Tamén destaca nesta obra, segundo o xurado, un tratamento da sociedade rural afastado do costumismo. Os membros do xurado fixeron constar unha mención especial para a peza Último capítulo, valorando a súa conexión coas estéticas actuais e a agudeza dos diálogos.

A autora de O mal da vaca, Begoña García Ferreira, naceu en Santiago de Compostela. Estudou Xeografía e Historia e na actualidade amplía estudos en arqueoloxía na República Checa. Traballa en Praga como profesora de español. Participou en varias obras de Teatro Universitario e foi compoñente da compañía profesional Cachuzo Teatro. O mal da vaca é a súa primera obra dramática para a radio.

O libro cedé de Xerais, ademais das dúas obras gañadoras, inclúe os textos e as gravacións das outras dúas finalistas, Ola Silvia, ¿estás aí? de Fátima Rodríguez Figueiras e Último capítulo de Roi Vidal Ponte.

O libro cedé, prologado por Quico Cadaval, estará a venda nas librarías na semana do libro, ao prezo de 15 euros.

Curso en liña para o profesorado de Matemáticas

Abril 16, 2008

No noso espazo web pode atoparse información sobre a convocatoria dun curso de formación, a través de Internet, dirixido ao profesorado de matemáticas do ensino secundario.

Con este curso, organizado en colaboración co ICE da Autónoma de Madrid, Xerais pretende colaborar na formación do profesorado de matemáticas no emprego de programas informáticos como Wiris (do que Xerais realizou a súa versión en galego este curso), GeoGebra, Excel ou Calc. Os dous titores do curso serán José María Arias Cabeza e Ildefonso Maza Sáez, autores dos nosos materiais curriculares (libros de texto, propostas didácticas e propostas didácticas dixitais) de matemáticas para ESO e Bacharelato.

“Matádeo mañá”, reeditado

Abril 15, 2008

A reedición de Matádeo mañá, o apaixonante libro memorialístico de Elixio Rodríguez, constituíu unha das obras máis demandadas na recente Feira do Libro de Santiago. Esta segunda edición foi revisada polo autor, pouco antes de falecer, engadíndolle un índice alfabético; ademais, o texto foi actualizado á nova ortografía, maquetado sobre o novo formato da colección, redeseñada a cuberta, ocupándose Aser Álvarez da preparación do adral.

Nestes meses, o departamento de edición da editorial prepara novas reedicións: Méndez Ferrín revisa as probas da edición definitiva de Percival e outras historias; Manuel Rivas as de En salvaxe compaña e Todo ben; e Agustín Fernández Paz as de Aire negro. Todas estas reedicións aparecerán antes do verán, con nova presentación de cuberta.

Matádeo mañá é un testemuño autobiográfico excepcional; a reconstrución do emocionante periplo vital deste aviador galeguista durante a Guerra Civil: un tempo ralentizado polo cárcere, o terror dos paseos, a súa fuxida cara ao bando republicano, os xuízos sumarísimos que sufriu e o seu traballo como secretario da Solidaridade Antifeixista Galega xunto con Castelao. Tamén é unha memoria lúcida do exilio galego en México, onde Elixio Rodríguez foi un dos promotores da emisión radiofónica A hora de Galicia e do Padroado da Cultura Galega e colaborador teimudo da revista Vieiros que dirixían Luís Soto e Carlos Velo, «xérmolo e vangarda política dun anovado nacionalismo galego», en palabras do historiador Elixio Villaverde, autor do limiar destas memorias apaixonantes. Este é un relato trepidante de feitos históricos, políticos, diplomáticos e bélicos, que constitúe unha grande achega á nosa memoria colectiva. Esta segunda edición destas memorias, consideradas como un dos cumes do xénero autobiográfico en lingua galega, foi revisada e corrixida polo autor antes do seu pasamento, á que se lle engadiu un índice onomástico e un adral de Aser Álvarez.

Presentación “Fidel Castro. A miña vida”

Abril 14, 2008

O mércores 16 de abril, ás 20:00 horas, celebrarase na Biblioteca de Marín a presentación do libro Fidel Castro. A miña vida. Conversas con Ignacio Ramonet. No acto, organizado por Xerais en colaboración co Colectivo Nacionalista de Marín, participarán Xosé M. García Crego, tradutor da edición galega e director de edición da editorial; Moncho Leal, representante da Asociación de Amizade Galego-Cubana “Francisco Villamil” e Alejandro Fuentes Hernández, cónsul xeral da República de Cuba en Galicia.

Fidel Castro. A miña vida. Conversas con Ignacio Ramonet, publicado en Cuba co título Cien horas con Fidel, ven sendo un repaso demorado pola vida, a obra e o pensamento dunha das figuras máis destacadas da historia recente da humanidade. Esta é a edición completa do libro. No verán de 2006, Fidel Castro foi sometido a unha intervención cirúrxica por causa dunha crise intestinal aguda; meses despois a televisión tráenos as imaxes dun Fidel convalecente, cun bolígrafo na man: revisaba e completaba a primeira versión desta obra con novas revelacións inéditas sobre a súa infancia, a súa familia e a historia de Cuba, as relacións co Che, con Hugo Chávez e con Evo Morales, a política internacional e o futuro do socialismo. Como eran os seus pais? Onde e cando se forxou o rebelde? Estivo o mundo no límite dunha guerra nuclear durante a “crise dos mísiles”? Que significou a presenza do papa Xoan Paulo II na illa en 1998? Que pensa da globalización neoliberal, da guerra de Iraq e do presidente Bush? Por que as autoridades cubanas aplican unha política de arrestos contra opositores ao réxime? Por que permanece na lexislación cubana a pena de morte? Que fan centos de médicos cubanos en países diferentes de medio mundo? Existe corrupción no Estado? Que futuro para a revolución despois de Fidel Castro? As orixes galegas; os galegos no asalto ao cuartel Moncada e no proceso revolucionario. Opinións sobre Fraga Iribarne; e un capítulo especial para as relacións co Estado español, personificadas en Felipe González e José Mª Aznar son algúns dos temas abordados neste groso volume de máis de seiscentas páxinas que constitúe un amplo percorrido pola controvertida figura de Fidel Castro, ao tempo que un apaixonante relato sobre o pasado, o presente e o porvir da Revolución cubana.

“Dicionario de Fraseoloxía Galega”

Abril 13, 2008

Despois de tres anos de traballo, o pasado venres entrou no almacén a edición do Dicionario de Fraseoloxía Galega, preparado polas profesoras Carme López Taboada e Mª Rosario Soto Arias. A obra aparecerá nas librarías coincidindo coa Semana do Libro.

Este Dicionario de Fraseoloxía Galega, preparado por Carme López Taboada e Mª Rosario Soto Arias, recolle case dez mil frases feitas, o que supón o maior repertorio lexicográfico deste tipo publicado en lingua galega.
A información proporcionada en cada entrada dividiuse en catro campos: “a clave”, “a frase”, “o significado” e “o texto”. No campo da “clave” identifícase a palabra de maior peso semántico do núcleo da frase, sendo, con frecuencia o substantivo primeiro en aparecer na orde de lectura, ou de non habelo, o verbo, o adxectivo ou o adverbio. No campo da “frase” diferénciase entre núcleo e contorna (identificado entre corchetes). No campo de “significado” preséntase a definición da entrada, enriquecida polas marcas de rexistro lingüístico ou de información metalingüística. Por último, no campo “texto”, proporciónase un exemplo de uso documentado, extraído de fontes literarias e xornalísticas, identificadas cunha clave. Este Dicionario de Fraseoloxía Galega inclúe, ademais, un apéndice de correspondencias casteláns das frases incluídas no dicionario.

Entrevista a Chus Pato

Abril 13, 2008

A publicación de Hordas de escritura, o máis recente poemario de Chus Pato, suscitou esta entrevista publicada en Galicia hoxe.

Eis para a escritora ourensá o sentido deste seu libro: “A cultura que recibimos nega á besta: non queremos ser animais. Danos medo sabernos animais porque a animalidade é o indicativo da morte: somos mortais porque somos animais. Por iso, abrazamos ese tópico de que o humano é a mediación entre o animal e a divindade. Cando falamos, nos facemos civilizados, parece que escapamos á morte, pero é a costa de anular a animalidade… Eu penso que hai algo que rescatar desa animalidade. Somos animais, fillos da terra, do cosmos. Se non nos conectamos con todo iso, camiñamos cara á destrución. Somos animalidade e linguaxe. Carne e linguaxe”.

Houbo unha morte e a morte entrou no amor; finalmente produciuse unha mudanza na escritura. Este libro é tamén a terceira entrega dunha pentaloxía que Chus Pato vén construíndo baixo o título xenérico de Método. Pero, cando o poema se compón, só lle é fiel a súa propia cicatriz; esa é a lei e a gravidade do texto. Un libro importante dunha das máis abisais, mutantes, imprescindibles e rupturistas escritas do panorama poético contemporáneo.

“Conversas con Darío Xohán Cabana”

Abril 13, 2008

Lucía Garzón publica en Fervenzas literarias unha anotación sobre a súa lectura de Conversas con Darío Xohán Cabana, o libro preparado por J.L. Calvo e Yago Rodríguez Yáñez. Transcribímola:

Galván en Saor, Fortunato de Trasmundi, O cervo na Torre, As aventuras de Breogán Folgueira foron as obras que máis me marcaron de Darío Xohán Cabana na miña infancia e xuventude. Vivín as aventuras e as historias que contaba como se fosen miñas.
Cando vin na miña libraría de Vigo este libro de Conversas con Darío Xohán Cabana non dubidei nin un intre en levármolo a casa, tal vez buscaba desentrañar algúns dos misterios que para min tiñan eses libros que lin de nova, ou tal vez para recrealas sensacións de volver a aqueles anos cando marchaba cedo ó meu cuarto e sobre a cama devoraba estes e outros libros.
O libro comeza cunha sección chama “Vida e Literatura”, onde Darío repasa a súa dura infancia na aldea de Roás, como se vivía daquela, o traballo do campo, os seus primeiros libros, a política, a relación con Alonso Montero ou con Xosé María Álvarez Blázquez… Un repaso á vida cultural, social e política da segunda metade do século XX.
A segunda parte trata da obra poética de Darío, aquí hei de recoñecer que non lin nin Home e terra, Romanceiro da Terra Chá nin outro libro de poesía do poeta lugués. Aínda que os autores deben de coñecela moi ben, porque desgranan polo miúdo a poesía de Darío, e Darío, como bo amante da poesía, deixase preguntar e responde cunha clarividencia asombrosa.
Na terceira parte volta á infancia. Descoñezo a súa poesía pero as súas novelas téñoas moi dentro. Ao igual que na parte dedicada á poesía, os autores inciden profundamente na obra narrativa de Darío. Que tempos! que libros!
A parte de conversas remata co Darío e a súa relación coa tradución, os seus primeiros poemas de autores franceses como exercicio do seu profesor Alonso Montero, a tradución da Divina Comedia de Dante e no proxecto de traducir poetas occitanos no que anda embarcado nestes intres.
Quen gozara cos libros de Darío que merque este libro, quen queira coñecer como era a Galicia post-ditadura que merque este libro.
Eu, polo momento, vou reler Galván en Saor.
Bicos.

Entrevista a Chelo Suárez

Abril 13, 2008

Chelo Suárez, que acaba de gañar o premio de literatura erótica Narrativas Quentes, é entrevistada por A Nosa Terra ao fío da publicación en Xerais Narrativa d’ A venus de cristal.

Pietro Puliani é un afamado vidreiro veneciano que posúe grandes coñecementos sobre alquimia e poderes adiviñatorios aprendidos no Exipto. Todo o que rodea a figura de Pietro é un gran misterio: vive nun dos illotes de Venecia e habita un suntuoso palacio ao que case ninguén accedeu nunca; agocha a súa face baixo unha máscara carnavalesca; goza do respecto da alta nobreza e da protección do Dogo; ninguén sabe a súa idade e moitos pensan que é o mesmo demo. Pietro Puliani dedica a súa vida á busca da beleza e da inmortalidade femininas. Para dar con elas, frecuenta todos os bordeis da cidade na procura da rapaza que agoche no seu interior unha alma inmortal e bela. Cunha prosa elaborada, que recrea ambientes preciosistas e ás veces oníricos, A venus de cristal, a novela coa que Chelo Suárez Muíños debuta na colección Xerais Narrativa, retrata con precisión descricións de escenas e lugares marabillosos e personaxes entre fantásticos e grotescos daquela Venecia do século XV, conducindo ao lector cun ritmo áxil polas súas páxinas.

Premios Irmandade do libro 2007

Abril 13, 2008

Na noite do sábado, 12 de abril, foron fallados no Club Náutico de Sanxenxo os XVII Premios “Irmandade do libro” organizados pola Federación de Libreiros de Galicia. Xerais obtivo os dous premios outorgados a obras publicadas durante o pasado ano 2007: O señor Lugrís e a negra sombra de Luís Rei Núñez mereceu o premio ao “Libro do ano 2007” e De provincia a nación. Historia do galeguismo político de Justo Beramendi o premio á “Obra editorial do ano 2007“.

A novela de Luís Rei Núñez, que xa o pasado fin de semana obtivera o Premio da Crítica 2007, consolídase con este segundo recoñecemento consecutivo como a mellor novela galega editada o pasado ano. Pola súa banda, o premio á voluminosa obra de Justo Beramendi constitúe o primeiro recoñecemento a un traballo autoral de dúas décadas no que se reconstrúe o relato político da nación galega.

De Provincia a nación. Historia do galeguismo político é unha investigación sistemática da natureza e evolución dos movementos sociopolíticos de reivindicación de Galicia como suxeito político de seu dende as súas primeiras manifestacións individuais no século XVIII até a actualidade. O tratamento do provincialismo, do rexurdimento e do rexionalismo do século XIX, e máis aínda do nacionalismo galego do século XX, faise cunha profundidade sen precedentes. Para a análise acaída das diferentes dimensións –a ideolóxica, a social, a organizativa, a electoral– e das súas interrelacións, o autor incorpora conceptos e modelos analíticos propios que implican unha notable innovación metodolóxica no eido do estudo do nacionalismo. As maiores novidades neste sentido son a reconstrución das estruturas das ideoloxías, a caracterización das bases sociais e a técnica aplicada para desvelar e cuantificar a fraude electoral na Segunda República. Ademais, en paralelo coa historia central, vai trazando a da cuestión nacional en España, o que permite ter en conta a incidencia de factores extragalegos e comparar o galeguismo político cos seus análogos doutros territorios do Estado español. Isto unido á consideración da natureza e dos problemas maiores da sociedade galega de cada época, dá as claves para unha explicación convincente das causas do nacemento, persistencia, posibilidades e limitacións do nacionalismo galego. Xa que logo, este libro é unha contribución decisiva para coñecer e entender, por que Galicia ten hoxe unha personalidade política irreversiblemente diferenciada.

Os premios no resto das modalidades foron: os suplementos de cultura e educación de Faro de Vigo mereceron o premio de “Medios de Comunicación e Novas Tecnoloxías“; o Pen Club de Galicia obtivo o premio “Institucións“; o IES de Sanxenxo o premio de “Centros de Ensino“; a Libraría Trama de Lugo o premio de “Libraría” e Xosé María Álvarez Cáccamo o de “Autor“.

“O club da calceta”

Abril 12, 2008

María Reimóndez presentou a pasada semana en Boloña, Roma, Milán e Padova a edición italiana d’ O club da calceta, novela editada por Xerais no 2006 e cuxa tradución se converteu en pouco tempo no título máis vendido da editorial Gran Vía Edizioni.

Coincidindo coa Feira do Libro Infantil e Xuvenil, María Reimóndez comezou a xeira de presentacións en Boloña, o día 1 de abril, nun acto que contou coa participación da xornalista italiana Giulia Gadaleta. O día seguinte, o café Papyrus de Roma acolleu unha dramatización de textos de tres das protagonistas da novela: Elvira, Rebeca e Nanda. Na capital italiana interviñeron tamén o tradutor e profesor de lingua e literatura galega da universidade La Sapienzza de Roma, Attilio Castellucci, e a lectora de galego da mesma universidade, Inma Otero Varela. Ademais, tanto en Roma como en Milán, a autora luguesa contou coa presenza de clubes de calceta locais. A súa viaxe rematou en Pádova o venres 4 de abril, nun acto no que, ademáis da autora e do traductor, participaron o profesor de filoloxía da universidade da Perugia Carlo Pulsoni e a lectora de galego da universidade de Pádova, Maria Cendau. Aproveitando a súa presenza en Italia, o grupo de estudo sobre literatura contemporánea da Universidade de Pádova ofreceulle ademais a María Reimóndez participar nunha compilación de relatos sobre as cidades europeas que se publicarán primeiro na rede e máis tarde en en formato libro.

A piques de sair a edición en castelán a cargo da Editorial Algaida, O club da calceta, novela editada por Xerais en 2006 vai pola tercera edición en galego. Ademais, a compañía Teatro do Morcego está de xira coa versión teatral polas salas das distintas cidades galegas e Antón Dobao prepara unha adaptación para televisión.

Galiciae

Abril 12, 2008

A noticia do peche de admisión de orixinais dos Premios Xerais 2008, nos que se presentan 114 orixinais, é comentada en Galiciae.

Merlíns para a primavera

Abril 11, 2008

Hoxe entraron no almacén catro novos títulos da colección Merlín:

Nas librarías a vindeira semana.

Presentación “IIº Premio Teatro Radiofónico”

Abril 10, 2008

“A cidade e os días”

Abril 10, 2008

Por fin, despois de case oito meses de traballo, temos na imprenta a tradución d’ A cidade e os días, o voluminoso calendario histórico de Vigo de don Xosé María Álvarez Blázquez. Consideramos esta edición como un dos fitos máis relevantes na homenaxe nacional que a sociedade galega tributa ao editor de Monterrei e Castrelos. O libro estará nas librarías na primeira semana de maio. Presentamos a cuberta (na que pretendimos emular a realizada en técnica serigráfica na edición príncipe) e transcribimos a nota editorial que preparamos:

Esta edición d’ A cidade e os días, publicada por Xerais en colaboración coa alcaldía do concello de Vigo, rescata para a lingua galega o calendario histórico de Vigo, desenvolto por Xosé María Álvarez Blázquez ao longo de 1959 nas páxinas de Faro de Vigo e publicado, logo, en formato de libro por Ediciones Monterrei en 1960. Unha obra monumental, na que Xosé María ofrece un impresionante fresco histórico de Vigo, desde o burgo de pescadores da Idade Media que foi, pasando polo carácter de porto corsario que abrigou no século XVIII, ao empuxe da abella ribeira que a convertiu na cidade portuaria e industrial de hoxe. Tras a súa primeira publicación, hai case cincuenta anos, A cidade e os días –a pesar de que moitos dos datos e informacións, afortunadamente, foron superados pola actual historiografía viguesa– non perdeu un ápice do seu interese xa que constitúe moito máis ca un libro de historia. A cidade e os días é unha apaixonada biografía literaria da cidade de Vigo e da súa contorna, escrita cunha prosa maxistral e un alento narrativo moi notable. Eis nese carácter profundamente literario onde reside a importancia e a beleza deste grande relato colectivo, que dificilmente vai quedar obsoleto.

Premios Xerais 2008, pechada a admisión de orixinais

Abril 10, 2008

Pechada a admisión de orixinais dos Premios Xerais 2008, o número de participantes de cada unha das modalidades é o seguinte:

XXIIIº Premio Merlín de Literatura Infantil: 32

XXVº Premio Xerais de Novela: 54

IIIº Premio Fundación CaixaGalicia de Literatura Xuvenil: 28

A composición dos xurados darase a coñecer durante o mes de maio.

Presentación de “Diario dun pai acabado de nacer” de Henrique Alvarellos

Abril 10, 2008

O venres, 11 de abril, ás 20:00 horas, continuarán as presentacións de Xerais na Feira do libro de Santiago. Nese momento presentarse o libro de Henrique Alvarellos, Diario dun pai acabado de nacer. Manuel Bragado acompañará ao autor no acto, no que serán lidos fragmentos do diario.

O xornalista Henrique Alvarellos comezou este diario íntimo no mesmo intre de saber que ía ser pai. Aquí están as risas, os acenos, as anécdotas, as experiencias e mesmo «as medras» do novo ser, do cambio radical na vida de quen afronta a paternidade. A súa intención era tamén ir reflexionando sobre o papel do pai, esa función que ninguén adoita tratar, deténdose exclusivamente no intransferible labor da nai. Pois ben, aquí, un pai. O pai en primeiro plano, coprotagonista desde os primeiros días da vida do fillo. Durante cinco anos o autor viu medrar o seu fillo e gozou con el, que pasou de bebé a neno. Pero nestes cinco anos foi tamén o tempo en que, inesperadamente, o autor perdeu a seu pai. O resultado desa sacudida, desa contusión son as páxinas deste Diario dun pai acabado de nacer. Páxinas iniciáticas que envolven grandes momentos de ledicia, de ilusión e futuro; a carón dos momentos de desesperanza, de confusión e de dor.

Presentación de “Incertos” de Antón Dobao

Abril 9, 2008

O xoves, 10 de abril, as 20:00 horas na Feira do Libro de Santiago, presentarase Incertos, o volume de relatos de Antón Dobao. No acto participarán Darío Xohán Cabana, Manuel Bragado e o autor.

Estes contos incertos de Antón Dobao apuntan ao horizonte do que non é predicible. Son trece historias nas que o extraordinario, o inesperado, acaba por se converter na marca distintiva dunhas vidas aparentemente normais. Porque nada do aparente é real e a realidade habita outras dimensións. Nestes relatos, as personaxes non son apenas monecos nas mans dun fado caprichoso, senón que tecen a súa vontade, cos seus actos, cos seus desexos e os seus temores, as encrucilladas en que se verán atrapadas as súas vidas. Para o lector, o inesperado accede en toda a súa naturalidade, con toda a crueldade, con absoluta fereza; fai agromar os recantos menos coñecidos evidenciando o principio de incerteza. Mais sobre todas estas historias aboia inevitablemente aquilo que nos caracteriza como humanos: a necesidade de comunicar, de amar, de negar a presenza imperial da morte. E as múltiples faces do poder.

Premios AELG 2007

Abril 9, 2008

O sábado 26 de abril, en Santiago de Compostela, terá lugar a entrega dos Premios da Asociación de Escritores en Lingua Galega 2008.

Nove obras publicadas o pasado ano por Xerais atópanse entre as finalistas: Illa Soidade de An Alfaya, A lagoa das nenas mudas de Fina Casalderrey, Minimaladas de Carlos López Gómez, Boas noites de Paula Carballeira e O único que queda é o amor de Agustín Fernández Paz na categoría de literatura infantil; Hai cu: pintadas no báter de O Leo e Cólera de María Xosé Queizán, na de poesía; De provincia a nación: historia do galeguismo político de Justo Beramendi, na de ensaio e O señor Lugrís e a negra sombra de Luís Rei Núñez, na categoría de narrativa.

Premios IGAEM 2008

Abril 8, 2008

O IGAEM convocou a XVIIª edición do Premio Álvaro Cunqueiro para textos teatrais e a IIIª edición do Premio Manuel María de literatura dramática infantil, que o vindeiro ano serán coeditadas polo IGAEM e Xerais dentro da colección Biblioteca Dramática Galega. Nas próximas semanas apareceran nas librarías as obras gañadoras da edición do ano 2007, Historia da chuvia que cae todos os días de Roberto Salgueiro (XVIº Premio Álvaro Cunqueiro) e Gamer over de Carlos Losada (IIº Premio Manuel María).

Finalistas no Premio San Clemente

Abril 8, 2008

Dúas das novelas de Xerais Narrativa publicadas o pasado ano foron declaradas finalistas da XVª edición do Premio Arcebispo Juan de San Clemente: Cardume de Rexina Vega, na categoría de mellor novela galega, e Terrorista de John Updike, na de novela estranxeira. Un xurado de lectores, formado por alumnos e alumnas de bacharelato de cinco centros de toda Galicia, valorará as obras finalistas. Na pasada edición deste mesmo premio a obra galega gañadora foi O club da calceta de María Reimóndez.

Entrevista a Rexina Vega

Abril 7, 2008

Pura Salceda entrevista en Vieiros a Rexina Vega, autora de Cardume, a novela gañadora do Premio Xerais de Novela 2007. Reproducimos dous dos parágrafos desta longa entrevista:

Pura Salceda: Como lle cambia a un a vida cando é Premio Xerais de Novela?
Rexina Vega: Aínda, a tantos meses xa do Premio, non sei ben que contestar. O que me cambiou a vida, no máis fondo, foi o feito de ser quen de publicar unha novela. Ese era o meu soño, o que non daba feito por mil escusas. O feito de conseguir converterme en escritora foi para min o verdadeiramente importante. Sentín paz. Equilibrio. Logo viñeron todos eses rebumbios mediáticos do Xerais, pero iso é, en realidade, secundario, teñen que ver con algo que non é necesariamente a literatura, a escritura, é a proxección dunha sociedade, un tipo de espéctaculo…

P.S.: Cardume é, sen dúbida, a recuperación da memoria histórica dun período que xa queda moi afastado para os nosos fillos. Que cres que a túa novela achega a esta memoria?
R.V.: Cardume é a historia duns seres mediocres, conscientes da súa cativeza, pero que non se resignan. Cardume é a historia de seres anónimos acosados por unha situación límite e que deciden actuar, ou non. Fala da guerra como unha experiencia moral. Por iso, coido que debería prestarse a unha lectura actual: unha reflexión sobre o horror, sobre o horror da nosa historia contemporánea, pero que tamén podería aplicarse ao noso presente.

“A cultura do pan”, entrevista a Xosé Lois Ripalda

Abril 7, 2008

Con motivo da recente aparición nas librarías d’ A cultura do pan, A Nosa Terra publica unha interesante entrevista co etnógrafo e escritor Xosé Lois Ripalda.

A cultura do pan é a crónica etnográfica e divulgativa dunha das nosas máis identificables tradicións, concibida xa desde o salientable lugar que os cereais ocuparon na nosa historia alimentaria, dada a súa prolongada conservación e á súa doada comercialización. O autor repasa unha a unha todas as cuestións ligadas a esa tradición que deu lugar a pans de tanta sona coma os do Porriño ou os de Cea, e orixinou topónimos como Terras do Pan. Desde o cultivo do trigo, o millo e o centeo até súas labouras; desde a tradición oral até os elementos etnográficos vencellados ao pan, coma os muíños; desde a lareira até o amasado; desde o forno e as enfornadas, aos pans de sona no país, sen esquecer a aplicación medicinal dos cereais e as receitas, A cultura do pan, de Xosé Lois Ripalda, constitúe unha homenaxe ao peso desa tradición en Galicia.